ଆଜିକାଲି ଖୁବ କମ ପିଲା ଅଛନ୍ତି ଯେଉଁମାନେ ବାପା ମା’ଙ୍କ ଖୁସି ପାଇଁ କିଛି କାମ କରୁଥିବେ କିମ୍ବା ନିଜ ଇଚ୍ଛାକୁ ଏବଂ ନିଜ ଆବଶ୍ୟକତାକୁ ଜଳାଞ୍ଜଳି ଦେଇ ଭଲ ଭବିଷ୍ୟତ ପାଇଁ ଦିନ ରାତି କାମ କରୁଥିବେ । କିନ୍ତୁ ବାସ୍ତବରେ କହିବାକୁ ଗଲେ ଆଜି ବି ଅନେକ ଝିଅ ପୁଅ ଅଛନ୍ତି ଯେଉଁମାନେ ମଉଜ ମଜଲିସର ଜୀବନକୁ ନବାଛି କଷ୍ଟ ଏବଂ ପରିଶ୍ରମ ଜୀବନକୁ ବାଛି ନେଇଛନ୍ତି । କାରଣ ସମୟ ବର୍ବାଦ କରିବାକୁ ଚାହିଁଲେ ଲୋକ କୌଣସି ପ୍ରକାରେ ବି ସମୟ ବର୍ବାଦ କରି ପାରିବ । କିନ୍ତୁ ନିଜର କର୍ତ୍ତବ୍ୟକୁ ବୁଝି ସମୟ ଅପଚୟ କରିବାରୁ ବିରତ ରହି କଠିନ ପରିଶ୍ରମ କରିବା ଭଳି ଚିନ୍ତାଧାରା କେତେ ଜଣଙ୍କର ଥାଏ ?
ଆଜି ଆମେ ଏଭଳି ଜଣେ ବ୍ୟକ୍ତିତ୍ବଙ୍କ ବିଷୟରେ କହିବାକୁ ଯାଉଛୁ ଯିଏକି ବାପା ମା’ଙ୍କ ଝିଅ ହୋଇଥିଲେ ବି ପୁଅ ହୋଇ ଘରର ସବୁ କାମ ତୁଲାଉଛନ୍ତି । ସେ ହେଉଛନ୍ତି ଅଞ୍ଜନା ଦୋରା ଏବଂ ଘର ବ୍ରହ୍ମପୁର । ପିଲାଦିନରୁ ମଧ୍ୟ ତାଙ୍କର ସଜବାଜ ହେବା ଏବଂ ଝିଅ ଭଳି ରହିବାର ଇଚ୍ଛା ଥିଲା । କିନ୍ତୁ ପରିବାରର ପରିସ୍ଥିତି ପାଇଁ ସେସବୁକୁ ସେ ଅନେକ ବର୍ଷ ହେବ ଭୁଲି ଯାଇଛନ୍ତି ଏବଂ ନିଜକୁ ପୁଅ ଭଳି ସଜାଇ ଘରକୁ ଚଳାଇବାକୁ ଏବଂ ବାପା ମା’ଙ୍କୁ ଭଲ ଜୀବନ ଦେବାକୁ ସବୁକିଛି କାମ କରୁଛନ୍ତି । ଖାଲି ସେତିକି ନୁହେଁ ଦୁଇ ଭଉଣୀଙ୍କ ବିବାହ କେମିତି ଭଲ ହୋଇ ପାରିବ , ସେସବୁର ଚିନ୍ତାକୁ ମଧ୍ୟ ମୁଣ୍ଡକୁ ନେଇଛନ୍ତି ।
ଅଞ୍ଜନା କହନ୍ତି ଯେ ସେ ଏଭଳି ପୁଅ ଗେଟଅପରେ ତାଙ୍କର ଜୀବନ ବଞ୍ଚିବା ସହଜ ହୋଇ ଯାଇଛି । କାରଣ ଏଭଳି ଲୁକ କାରଣରୁ ତାଙ୍କ ଉପରେ କୁଆଡ଼େ କାହାରି ଖରାପ ନଜର ପଡୁନାହିଁ । ଅଞ୍ଜନା ବର୍ତ୍ତମାନ ନିଜର ଏକ ଗାଡ଼ିରେ ପରିବା ନେଇ ବୁଲି ବୁଲି ବିକନ୍ତି । ଆଉ ଏହି ବ୍ୟବସାୟ ତାଙ୍କର ବେଶ ଭଲ ଚାଲିଛି । ଲୋକ ଡାଉନ ପାଖରୁ ହିଁ ସେ ଏହି ବିଜନେସ କରି ଆସୁଛନ୍ତି । ଖାଲି ସେ ଯେ ଏକୁଟିଆ ତାହା ନୁହେଁ ତାଙ୍କ ବାପା ମଧ୍ୟ ତାଙ୍କୁ ପୂର୍ଣ୍ଣ ସହଯୋଗ କରନ୍ତି । ଏମିତିକି ତାଙ୍କର ଏକ ପରିବା ଦୋକାନ ମଧ୍ୟ ଅଛି । ତେବେ ଅଞ୍ଜନା ପରିବାରର ପ୍ରତିପୋଷଣ ପାଇଁ ଅଷ୍ଟମ ଶ୍ରେଣୀରୁ ପାଠ ପଢ଼ା ଛାଡ଼ିଥିଲେ ।
ପୁଣି ତାଙ୍କର ବଡ଼ ଭାଇ ଲୋଭ୍ ମ୍ୟାରେଜ କରି ପରିବାର ଠାରୁ ଦୂରରେ ରହନ୍ତି । ଯାହାଙ୍କ ନେଇ ସେ ଖୁହ ଦୁଃଖ ପ୍ରକାଶ କରିଛନ୍ତି । ଖୁବ କମ ବୟସରୁ ଟଙ୍କା ରୋଜଗାର ପାଇଁ ଲେବର କାମ କରିବାକୁ ନିଜ ପରିବାର ସହିତ ଆସି ଭୁବନେଶ୍ୱରରେ ରହିଥିଲେ । ସେତେବେଳେ ପରିବାରର ଅବସ୍ଥା ଖୁବ ଖରାପ ଥିଲା । କିନ୍ତୁ ବର୍ତ୍ତମାନ ତାଙ୍କ ଅବସ୍ଥା ବଦଳିବାରେ ଲାଗିଛି ।
ସେ କହନ୍ତି ଯେ ବର୍ତ୍ତମାନ ସମୟରେ ଲୋକେ ତାଙ୍କୁ ଖୁବ ପ୍ରଶଂସା କରନ୍ତି କାରଣ ସେ ନିଜ ବାପା ମା’ଙ୍କ ପାଇଁ ଏତେ କିଛି କରୁଛନ୍ତି । ଆଜିକାଲି ପୁଅ ଝିଅ ନିଜ ବାପା ମା’ଙ୍କୁ ଯେଉଁଠି ଖୁସି ବଦଳରେ ଦୁଃଖ ଦିଅନ୍ତି ସେଠାରେ ଅଞ୍ଜନା ନିଜ ବାପା ମା’ଙ୍କ ଖୁସି ପାଇଁ ସବୁ କାମ କରୁଛନ୍ତି ଏବଂ ନିଜକୁ ସେ ଖୁବ ଗର୍ବିତ ମଧ୍ୟ ଅନୁଭବ କରୁଥିବା କହିଛନ୍ତି ।
