ରାଜ୍ୟ ସରକାର ଆଗକୁ ଅନୁଷ୍ଠିତ ହେବାକୁ ଥିବା ଦୁର୍ଗା, ଲକ୍ଷ୍ମୀ ଓ କାଳୀ ପୂଜା ପାଇଁ ରାଜ୍ୟ ସରକାରଙ୍କ ଗାଇଡଲାଇନ୍ସ ଜାରୀ କରିଛନ୍ତି। ସେପ୍ଟେମ୍ବର, ଅକ୍ଟୋବର ଏବଂ ନଭେମ୍ବରରେ ହେବାକୁ ଥିବା ପର୍ବପର୍ବାଣୀ ପାଇଁ ଏହି ନିୟମାବଳୀ ଗୁଡ଼ିକୁ ଜାରି କରାଯାଇଛି। ସରକାରଙ୍କ ଦ୍ୱାରା ଜାରି କରାଯାଇଥିବା କୋଭିଡ-୧୯ର ଗାଇଡଲାଇନ ଅନୁଯାୟୀ, ସାରା ରାଜ୍ୟରେ ସମସ୍ତ ଧାର୍ମିକ ସ୍ଥାନ, ପୂଜାପାଠ ସ୍ଥାନ ୩୦ ସେପ୍ଟେମ୍ବର, ୨୦୨୦ ପର୍ଯ୍ୟନ୍ତ ବନ୍ଦ ରହିବ। ସାମାଜିକ ରାଜନୈତିକ, କ୍ରୀଡା, ମନୋରଞ୍ଜନ, ଏକାଡେମିକ, ସାଂସ୍କୃତିକ, ଧାର୍ମିକ କାର୍ଯ୍ୟ ଏବଂ ଅନ୍ୟାନ୍ୟ ବଡ଼ ମଣ୍ଡଳୀଗୁଡିକ ଅନୁମତିପ୍ରାପ୍ତ ନୁହେଁ।
ମାନ୍ୟବର ହାଇକୋର୍ଟଙ୍କ ଦ୍ୱାରା WP (C) PIL NO ୨୧୦୧୬/୨୦୨୦, ୩୧-୮-୨୦୨୦ ତାରିଖର ଆଦେଶକୁ ଦୃଷ୍ଟିରେ ରଖି , ଦୁର୍ଗା ପୂଜା, ଲକ୍ଷ୍ମୀ ପୂଜା, କାଳୀ ପୂଜା ପାଳନ ପାଇଁ ଏହି ନିର୍ଦ୍ଦେଶାବଳୀ ଗୁଡ଼ିକୁ ପାଳନ କରାଯିବ ବୋଲି ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି।
୧- ପୂଜାପାଠ / ମଣ୍ଡପରେ ପୂଜା ପରିଚାଳନା ପାଇଁ ଆୟୋଜକମାନେ ଆବେଦନ କରିବେ। ଜିଲ୍ଲା ମାଜିଷ୍ଟ୍ରେଟ୍ କିମ୍ବା ତାଙ୍କ ଦ୍ୱାରା ଅନୁମୋଦିତ ଅନ୍ୟ ଅଧିକାରୀଙ୍କ ଠାରୁ ଆବଶ୍ୟକ ଅନୁମତି ପାଇବା ଆବଶ୍ୟକ। କଟକ ଏବଂ ଭୁବନେଶ୍ୱର କମିଶନର ଅଧୀନରେ ଥିବା ଅଞ୍ଚଳ ପାଇଁ କଟକ ତଥା ଭୁବନେଶ୍ୱର ପୋଲିସ କମିଶନର କିମ୍ବା ତାଙ୍କ ଦ୍ୱାରା ଅନୁମୋଦିତ ଅନ୍ୟ କୌଣସି ଅଧିକାରୀ ଏହିପରି ଅନୁମତି ପ୍ରଦାନ କରିବେ।
୨- ପୂଜା ପାଳନ ପାଇଁ କେବଳ ମଣ୍ଡପ ଭିତରେ ହିଁ କରାଯିବ। ସର୍ବସାଧାରଣଙ୍କ ଅଂଶଗ୍ରହଣ ହେବ ନାହିଁ। ୩- ପୂଜା ମଣ୍ଡପଗୁଡିକ ତିନି ପାର୍ଶ୍ୱରୁ ଆଚ୍ଛାଦିତ ହେବ ଏବଂ ଚତୁର୍ଥ ପାର୍ଶ୍ୱ ଆଂଶିକ ବନ୍ଦ ରହିବ ଯେପରିକି ବାହାରକୁ ମୂର୍ତ୍ତି ଦେଖାଯିବେ ନାହିଁ। ୪- ମୂର୍ତ୍ତିର ଆକାର ୪ ଫୁଟରୁ କମ ରହିବ। ସର୍ବସାଧାରଣଙ୍କ ପାଇଁ କୌଣସି ମାଇକ ବ୍ୟବସ୍ଥା ହେବ ନାହିଁ।
୫- ଯେକୌଣସି ନିର୍ଦ୍ଦିଷ୍ଟ ସମୟରେ, କର୍ତ୍ତା ଏବଂ ବ୍ରାହ୍ମଣଙ୍କୁ ମିଶାଇ ୭ ଜଣ ବ୍ୟକ୍ତିଙ୍କଠାରୁ ଅଧିକ ବ୍ୟକ୍ତି ମଣ୍ଡପରେ ରହିବେ ନାହିଁ। ଏଥିରେ ଆୟୋଜକ (କର୍ତ୍ତା) ଏବଂ ପୁରୋହିତ ଏବଂ ସପୋର୍ଟ ଷ୍ଟାଫ୍ ଅନ୍ତର୍ଭୁକ୍ତ। ଅର୍ଥାତ୍ ଏମାନଙ୍କୁ ମିଶାଇ ସର୍ବୋମୋଟ ୭ ଜଣରୁ ଅଧିକ ଲୋକ ମଣ୍ଡପରେ ରହିପାରିବେ ନାହିଁ। ମଣ୍ଡପରେ ଉପସ୍ଥିତ ବ୍ୟକ୍ତିମାନେ ସମସ୍ତ କୋଭିଡ ନିୟମ ଅନୁସରଣ କରିବେ। କେନ୍ଦ୍ର ଏବଂ ରାଜ୍ୟ ସରକାର ତଥା ସ୍ଥାନୀୟ ପ୍ରଶାସନ ଦ୍ୱାରା ଲାଗୁ ସମସ୍ତ କୋଭିଡ ନିୟମ ଯେପରିକି ସାମାଜିକ ଦୂରତା, ମାସ୍କ ବ୍ୟବହାର, ବ୍ୟକ୍ତିଗତ ସ୍ୱଚ୍ଛତା ଏବଂ ପରିମଳର ପ୍ରୋଟୋକଲ ପାଳନ ବାଧ୍ୟତା ମୂଳକ ହେବ।
୬- ଆୟୋଜକ ଏବଂ ପୂଜା ପରିଚାଳନାରେ ଜଡିତ ଅନ୍ୟ ବ୍ୟକ୍ତିମାନେ ସ୍ଥାନୀୟ ପ୍ରଶାସନ / ଉପଯୁକ୍ତ କର୍ତ୍ତୃପକ୍ଷଙ୍କ ଦ୍ୱାରା ଧାର୍ଯ୍ୟ କରାଯାଇଥିବା ଅନ୍ୟ କୌଣସି ସର୍ତ୍ତାବଳୀଗୁଡିକ ପାଳନ କରିବେ। ୭- କୌଣସି ସ୍ନାନ କିମ୍ବା ଭସାଣି ପାଇଁ ଶୋଭାଯାତ୍ରା ହେବ ନାହିଁ। ମୂର୍ତ୍ତିଗୁଡ଼ିକ ସ୍ଥାନୀୟ ପ୍ରଶାସନ ଦ୍ୱାରା ସୃଷ୍ଟି କୃତ୍ରିମ ପୋଖରୀଗୁଡିକରେ ଭସାଣି କରାଯିବ। ୮- କୌଣସି ସଂଗୀତ କିମ୍ବା ଅନ୍ୟ କୌଣସି ମନୋରଞ୍ଜନ କାର୍ଯ୍ୟକ୍ରମ ହେବ ନାହିଁ। ୯- ସମସ୍ତ ଜିଲ୍ଲା ମାଜିଷ୍ଟ୍ରେଟ, ମ୍ୟୁନିସିପାଲିଟି, ଭୁବନେଶ୍ୱର-କଟକ କମିଶନର ଉପରୋକ୍ତ ନିର୍ଦ୍ଦେଶାବଳୀକୁ କଡାକଡି ଭାବେ କାର୍ଯ୍ୟକାରୀ କରିବେ।
୧୦- ଦଣ୍ଡବିଧାନ ବ୍ୟବସ୍ଥା:
ଯେକୌଣସି ବ୍ୟକ୍ତି ଏହି ପଦକ୍ଷେପଗୁଡିକର ଉଲ୍ଲଂଘନ କରିବେ ସେମାନଙ୍କୁ ବିପର୍ଯ୍ୟୟ ପରିଚାଳନା ଅଧିନିୟମ, ୨୦୦୫, ଏପିଡେମିକ ରୋଗ ଅଧିନିୟମ, ୧୮୯୭ ର ଧାରା ୫୧ ରୁ ୬୦ ଏବଂ ଆଇପିସିର ଧାରା ୧୮୮ ଅନୁଯାୟୀ ସେମାନଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
